sajhaonlinetv. com
माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल (प्रचण्ड) सँग नेपालका लागि अमेरिकी नवनियुक्त राजदूत डिन थम्प्सनले भेटवार्ता गरेका छन् । दाहाललाई भेट्न राजदूत थम्प्सन मंगलबार बिहान खुमलटार पुगेका थिए ।
भेटवार्तामा नेपाल र अमेरिकाबीचको सम्बन्धबारे छलफल भएको दाहालको सचिवालयले जानकारी दिएको छ । ‘भेटवार्तामा वर्षौंदेखिको दुई देशको सम्बन्ध, नेपाली राजनीति, आर्थिक विकासका बारेमा छलफल भएको छ,’ दाहालको सचिवालयले भनेको छ ।
अध्यक्ष दाहालले नेपालको विकासमा अमेरिकाले गर्दै आएको सहयोगबारे चर्चा गरेको उनको सचिवालयले जानकारी दिएको छ । ‘नेपाल र अमेरिकबीच वर्षौंदेखिको मित्रता रहेको छ । तपाईंको कार्यकालमा यो सम्बन्ध अझै प्रगाढ रहने मैले विश्वास लिएको छु,’ दाहालले भनेका थिए । नेपाल आर्थिक समृद्धिको अभियानमा रहेको बताउँदै दाहालले त्यसमा अमेरिकाको सहयोग आवश्यक रहेको बताएको उनको सचिवालयले जानकारी दिएको छ ।
राजदूत थम्पसनले प्राकृतिक र सांस्कृतिक विविधताले भरिएको सुन्दर मुलुक नेपालमा आउँदा खुसी व्यक्त गरेको दाहालको सचिवालयले जानकारी दिएको छ । ‘उहाँले नेपालको दिगो र समावेशी आर्थिक विकास लक्ष्य हासिल गर्न अमेरिकी सहयोग निरन्तर रहने विश्वास दिलाउनुभयो,’ राजदूत थम्प्सनको भनाइ उल्लेख गर्दै दाहालको सचिवालयले भनेको छ ।
७५ वर्षदेखिको नेपाल-अमेरिका सम्बन्ध आफ्नो कार्यकालमा अझै उचाई लिने विश्वास राजदूत थम्प्सनले व्यक्त गरेका थिए ।
