sajhaonlinetv. com
काठमाण्डौ,सबिन कुमार तोलाङ्गी — नेपाली कथानक चलचित्र ‘कार्साङ’ को छायांकन हिजो मंगलबार सकिएको छ ।
अभिनेता दयाहाङ राईले नवअभिनेत्री सिर्जना निङ्लेखुसँग जोडी बाँधेको फिल्म यम शेर्पाको निर्देशन रहेको उक्त फिल्मको छायांकन सिन्धुपाल्चोकको बाह्रबिसे, भोटेकोशीलगायत क्षेत्रमा पछिल्लो २२ दिनदेखि चलेको थियो ।
समयमै सहज रूपमा छायांकन सकिएपछि निर्देशक शेर्पाले भने, ‘अब पोस्ट प्रोडक्सनको काममा केन्द्रित हुनेछौं, सोचेजस्तै भयो भने चाँडै प्रदर्शन मिति तोकेर अघि बढ्नेछौं ।’ फिल्ममा दयाहाङ र सिर्जनाका अलावा जितु नेपाल, दिया मास्के, बुद्धि तामाङ, सृष्टि गौतम, छोकी शेर्पा, सुरवीर पण्डित, कर्मा शेर्पालगायतको पनि अभिनय रहेको छ ।
छायांकन सकिएसँगै ‘कार्साङ’ को चरित्रप्रधान फस्टलुकसमेत सार्वजनिक गरिएको छ, जसमा दयाहाङ र सिर्जनालाई ढ्याङ्ग्रो बाजासहित देख्न सकिन्छ । सामाजिक कथावस्तुमा बनाइएको फिल्मको पटकथा निर्देशक स्वयंले लेखेका हुन् । फिल्मको छायांकार पुरुषोत्तम प्रधानले नै फिल्मको निर्माण पनि गरेका हुन् ।
